Nagpangabay ang pinuno sang Bacolod Traffic Authority Office sa mga driver sang traditional jeepneys kag modern jeepneys nga sundon kag respetuhon ang gindesign nga traffic rerouting subong nga nagasaulog sang MassKara Festival bangud ini ang gin-aprubahan sang Sangguniang Panlungsod.
Sa interview sang Bombo Radyo kay Police Major Junji Liba, manageable ang dalagan sang trapiko sa una nga lima ka adlaw sang MassKara Festival.
Aminado si Liba nga may mga depekto sa rerouting apang mahapos man lang masolusyunan kaangay sang mga jeep nga Bata-Libertad nga nagashortcut sa downtown area.
Suno kay Liba, gindakop ang mga jeep nga naglabay sa Dalan Gonzaga kag ginwarningan ang mga traffic enforcers nga ipatuman sang hugot ang traffic rerouting.
Gin-athag ni Liba nga wala sila nagkulang sa pagremind sa mga jeepney drivers apang wala nila ginrespeto ang ginapatuman sang BTAO nga rerouting.
Santo sa record, indi magnubo sa 20 ka traditional jeepney ang nadakpan kagab-i samtang may isa naman ka modernized jeepney nga nadakpan bangud sila ang nagsulod sa Dalan Gonzaga.
Tinalikdan nga adlaw, naggutok man ang dalagan sang trapiko sa Bangga Metal sa Barangay Alijis bangud sa asphalt overlay apang nahitso naman.
Personal mismo nga ginamonitor ni Liba ang dalagan sang trapiko gani gab-i naman ini nagapauli.
Aminado ang BTAO head nga kulang ang halos 300 ka mga traffic enforcers apang ginlapta-lapta lang ni Liba ang ila nga deployment.
