Dakop sa ginpatigayon nga entrapment operation ang bag-o nga pinuno sang Criminal Investigation and Detection Group (CIDG)- Bacolod City bangud sa gina-alegar extortion sa sulod sang bulangan sa Purok Guanzon, Barangay Mansilingan ciudad sang Bacolod kahapon.
Ginkilala ang nadakpan kay Police Major Melvin Madrona nga masulo-sobra pa lang isa ka bulan nga nagapungko bilang tagpamuno sang CIDG-Bacolod.
Ang entrapment operation ang ginpatigayon sang gintingob nga pwersa sang Philippine National Police Integrity Monitoring Enforcement Group (IMEG) Visayas Field Unit, Special Action Force kag Negros Occidental Police Provincial Office (NOPPO).
Sa impormasyon nga nakuha sang Bombo Radyo Bacolod, isa ka KTV bar operator ang nagreklamo sang extortion batok kay Madrona.
Nahibaluan nga nagapangayo ang nasambit nga pulis sang P10 mil nga kwarta kag una nga naghatag sang P5 mil ang tagreklamo sadtong Pebrero 20.
Apang, liwat naman nga nagpangayo sang amo nga kantidad ang suspetsado kag diri na ginpatigayon ang entrapment operation batok sa iya.
Ginapahayag man nga may yara sang upod nga sibilyan si Madrona apang ini ang nakapalagyo.
Sa karon, tatlo na ka mga tagreklamo ang luyag magpasaka sang kaso nga extortion sa nasambit nga pulis.
Magluwas diri, pasakaan man siya sang kaso nga administratibo.
Ginahulat pa sa karon kun dal-on si Madrona sa Camp Crame bangud didto nahamtang ang opisina sang IMEG.
Nagagwa man sa records sang Quezon City Police District nga sadtong Marso 2017, ginreklamo man si Madrona sang isa ka motorista matapos niya ini ginsumbag bangud sa away sa trapiko.
Bangud diri, napahalin sa pwesto si Madrona kag sang bulan sang Enero sini nga tuig lang ginbutang liwat bilang hepe sang CIDG diri sa Bacolod.
