Indi gid makabawi ang piso nga dugang sa plete sa nagasaka nga gasto sang mga jeepney drivers, Ilabi na sa nagapadayon nga pagsaka sang presyo sang krudo bangud sang krisis sa Middle East.
Sa interview sang Bombo Radyo Bacolod kay Norgil Puda, isa ka jeepney driver nga nagabyahe sang Northbound Terminal – Shopping nga ruta, apisar magasaka ang pletehan, dako gihapon ang ila kapierdehan bangud sang nagamahal nga presyo sang gatong kada adlaw.
Ginpahayag niya nga humalin sang nagsaka ang presyo sang gatong, nagnubo man ang numero sang pasahero.
Suno diri, makapauli pa ini nga libo ang ginansya apang sa karon, nagadangat na lamang sa P350-400.
Dugang pa niya, yara na sa sobra isa ka gatos ang kada litro sang krudo gani halos tanan nga ila ginaganar ang nagakadto na lamang sa pagpatughong.
Ginkomparar sini ang nakaligad nga ginagasto niya sa krudo nga yara lamang sa P800 apang subong nagadangat na sa P1400 tubtob P1500.
Sa pihak sang ila sitwasyon, nagapadayon gihapon ang mga driver sa pagbiyahe biskan gamay na lang ang kita apang kun magsaka pa gid tuman ang krudo, mapilitan ini nga mag-untat na lamang sa pagbiyahe.
