Kampante ang Philippine National Police nga sarang nila nga madakpan ang pugante nga si Pastor Apollo Quiboloy sa madasig nga tinion.
Ini apisar nga makaduha ka beses na sila nga mapaslawan sa pagserbe sang arrest warrant sang kontrobersyal nga pastor, nga ila ginapatihan nga nagapanago lamang sa compound sang Kingdom of Jesus Christ (KOJC) sa Davao City.
Suno kay PNP Regional Office 11 Director Police Brigadier General Nicolas Torre III, sila ang kumbinsido nga yara lamang sa sulod sang compound si Quiboloy gani ila ginpahugot ang escape route.
Suno diri, nakahibalo na sila kun diin nagapanago si Quiboloy apang wala pa sila nakahibalo kun paano makasulod diri.
Ang PNP ang nagpatigayon sang isa ka exhaustive manhunt sa compound sang KOJC malapit sa Francisco Bangoy International Airport agud pangitaon si Quiboloy kag ang mga co-accused sini nga lunsay wanted bangud sa mga kaso sang child abuse kag human trafficking.
Apang apisar sang 2,000 ka mga police personnel nga nagapangita, wala sa gihapon nila nadakpan si Quiboloy.
Suno kay Torre, tiyempo lamang ang ila kinahanglan bangud natumod na nila ang exact location.
Ang nasambit nga operasyon ang nagresulta sa kamatayon sang isa sa mga followers ni Quiboloy bangud sa kakapoy samtang nagapatigayon sang pagpangita ang mga kapulisan.
