Ginpahayag sang Philippine National Police nga wala sang tinutuyo nga mangharass ukon mang-intimidate sang maskin sin-o ang ila ginapatuman nga “Oplan Katok.”
Ini ang statement ni PNP spokesperson Brigadier General Jean Fajardo matapos ginpahayag sang Commission on Elections nga indi ini pabor sa pagpatigayon sang Oplan Katok sa election season.
Suno kay Comelec Chairman George Erwin Garcia, ang tikang ang posible makatuga sang pagpang-abuso kag violation of rights.
Apang suno kay Fajardo, ang Oplan Katok ang para lamang sa mga gun owners nga expired ang mga lisensya.
Sa idalum sang inisyatibo, ang mga police personnel ang nagapatigayon sang house visitation agud abisuhan ang mga gun owners nga may expired nga mga lisensya nga mag-apply para sa renewal kag engganyuhon ang mga ini nga i-surrender ang ila mga unlicensed firearms para sa safekeeping purposes.
Gin-athag ni Fajardo nga indi na kinahanglan sang PNP nga magrequest sang permission nagikan sa Comelec agud magpatigayon sang Oplan Katok apang ginpahayag nga ila pagadiskusyunan ang nature sang inisyatibo kaupod ang poll body.
