BACOLOD CITY – Ginpasakaan sang reklamo sang Task Force Crusader ang matag-as nga mga opisyal sang Negros Island Region (Region 18) kag Bacolod City nga gin-alegar protektor sang illegal numbers game nga jai alai.
Sa pihak nga natuon sa Lunes Santo, nagpasaka sang reklamo sa Campo Crame si Task Force Crusader National Deputy Commander John Chong may angot sa nagapadayon nga operasyon sang jai alai sa Bacolod kag Negros Occidental.
Ini ang kasunod sang pagdangop sa iya agud magpangayo sang bulig sang isa ka concerned citizen nga luyag maimbestigahan ang issue sa illegal gambling.
Base sa reklamo, nagatindog nga protector sang jai alai sanday Police Regional Office 18 Director Police Chief Supt. Renato Gumban kag Bacolod City Police Office Director Police Senior Supt. Jack Wanky.
Ginpahayag naman nga financier sanday Edgar Millama kag Reymund Tongson samtang gin-alegar naman nga recruiter si Jake Jacinto kag bagman si Jesus Clavesillas.
Samtang, gin-alegar naman nga general coordinators sanday Dodong Claor, Roy Collado, Tuklaw, Boy Agong, Humpfrey Policarpio kag Bongbong Negro nga magluwas nga coordinator, amo man ang tiglawas ni Millama.
Suno kay Chong, trabaho sang kapulisan nga magpaathag kun ngaa indi madakpan ang mga yara sa likod sang jai alai.
Gin-apid ni Chong sa reklamo sini ang koteho sang jai alai nga gina-operate sang Vista Gaming Corporation kag nagatapik sa likod sang papel ang nasambit nga mga ngalan.
