BACOLOD CITY — Wala ginalauman ni Police Cadet Fritz John Vallador nga maga-graduate ini nga valedictorian sang Philippine National Police Academy Maragtas Class 2018.
Sa exclusive interview sang Bombo Radyo Bacolod kay Vallador, ginpahayag sini nga luyag lang sini matuman ang handom nga mangin isa ka police officer kag ang pag-graduate nga valedictorian, bonus ukon paaman na lang.
Suno sa Negrense valedictorian, tuman kabudlay sa sulod sang PNPA kag ang mga upod sini mga maalam kag topnotchers man gani nga wala gid ini naglaom nga magapanguna sa iya nga klase.
Nahisayran nga 20-anyos ini sang nagsulod sa PNPA sang 2014.
Ginpahayag man sini nga naanad na siya nga malayo sa pamilya ilabi pa nga nagdako ini sa pag-amuma sang iban nga tawo sang ginbilin ini sang iya iloy sang bata pa siya sang nagpangita ini sang trabaho kag karun isa na ka domestic helper sa Marbella, Spain.
Samtang, ginakabig man ni Vallador nga inspirasyon ang iya amay agud nga magpanikasog sa kabuhi apisar nga wala niya ini nakita halin sang siya ang ginbun-ag.
Bukas si Vallador nga makita ang iya amay kag nagalaom ini nga proud ini sa iya kun sa diin man ini.
Nahisayran sa iloy ni Fritz John nga si Ana Maria nga Chinese ang iya amay.
