Madamo pa sang mga nakumpiskar nga mga pointed kag bladed cleaning materials sa mga nagbisita sa Handumanan Public Cemetery subong nga Nobyembre 1.
Sa interview sang Bombo Radyo Bacolod kay Police Capt. Sherwin Galupar, station commander sang Bacolod Police Station 10, padayun ang ila pagbantay sa seguridad kag kahilwayan sang mga nagasulod sa sementeryo.
Suno diri, isa sa ginadumilian ang bladed materials, apang sa entrance madamo gihapon sang nakumpiskar, nga sarang man nga maclaim sa ila nga paggwa.
Paathag ni Galupar nga indi na karun ang tion sa pagpaninlo bangod ang Nobyembre 1 ang para na sa pagpangamuyo sa minatay.
Ginadumilian man ang makahulubog nga ilimnon, baraha kag magahod nga karaoke ukon sound system nga makadisturbo sa mga nagapangadi.
Ginapakamaayo sini nga apisar madamo sang tawo, wala naggutok kag free flowing lamang ang mga tawo.
Ini bangod ginsaylo sa ulu-unhan ang mga naga-offer sa pagpaninlo kag pagpinta sang mga pantyon kag wala na sa entrance.
Dugang pa nga kaangay nga naandan na sang mga bisita, gani organisado na lamang ang ila nga pagsulod kag paggwa.
Magluwas sa kapulisan, nagabantay man mga personnel sang Bureau of Fire Protection, Public Order and Safety Office (POSO) guard kag mga gikan sa barangay.
Pangabay lamang ni Galupar sa mga magapadulong sa sementeryo nga kun mahimo indi dulungan nga magbiya sa balay kag mag-alternate na lamang sa pagbisita sa minatay agud malikawan nga makawatan.
Ang tatlo ka patrol car sang Bacolod Police Station 10 ang aktibo man sa paglibot sa Barangay Handumanan.
