Nagpanawagan ang deputy city director for operations sang Bacolod City Police Office (BCPO) nga mag-ugyon kag magbulig ang mga drug groups nga mag-untat na sa illegal drug trade bangud nakatilaw naman sila sang maayo nga pangabuhi.
Suno kay Police Lieutenant Col. Jovie Espenido, ginpahayag sini nga dapat mag-untat na ang mga drug personalities sa ila nga iligal nga buluhaton bangud naka-pondar naman ang mga ini sang mga balay kag salakyan, nakakaon sang manami nga pagkaon kag may yara na sang maayo nga pangabuhi.
Suno diri, magbulig kag mag-ugyon na lamang sila sa gobyerno agud mapapas na ang iligal nga druga sa ciudad.
Sa karon, magahulat na lamang si Espenido kun may yara sang drug personality nga magapadulong sa iya opisina agud manugid kun sin-o ang ila nga protector.
Nahibaluan nga naghatag sang ultimatum ang opisyal kun sa diin tubtob Enero 31 na lamang pwede makapadulong sa iya nga opisina ang mga personalidad nga imbolbado sa iligal nga druga bangud pagkatapos sini magasugod na siya sa iya nga operasyon.
