Kun kaisa may mga bagay nga ginatudlo sa atun nga daw wala man nagakabagay kaangay lamang sang isa ka police academy sa Japan nga nagatudlo sa ila mga lalaki nga kadete nga magmake-up.
Ang nasambit nga eskwelahan amo ang Fukushimaken Keisatsugakko Police Academy sa Fukushima Prefecture nga nagapatuman sang pinasahi nga training, kun sa diin ginatudluan ang 60 ka mgakadete kun paano maghimos sang kaugalingon gamit ang make-up kag husto nga grooming.
Suno sa academy, kabahin ini sang pagtudlo sang importansya sang katinlo kag pagpabilin sang professional image sa publiko.
Nagpartner ang academy sa kilala nga Japanese cosmetics brand nga Shiseido, nga nagpadala sang ila nga mga beauty consultant agud magtudlo sang insakto nga pag-moisturize sang panit, pagkay-o sang kilay kag buhok kag iban pa.
Magluwas sa Fukushima, ang Yamaguchi Police Academy ang nagahimo man sang kaangay nga programa kun sa diin ginatudluan ang mga pulis kun paano tinluan ang nawong.
