Ginakabig sang station commander sang Bacolod City Police Station 3 nga answered prayer ang papatukod sang bag-o nga police station.
Sa interview sang Bombo Radyo Bacolod kay Police Major Rondyl Tapang, ginkalipay niya ang pagdonate sang duta nga patindugan sang permanente sang police station kag ini ang bugay nga madugay na nila nga ginapangamuyo.
Suno kay Tapang santo sa estimate sang contractor ginabanta nga matapos ang pagtukod sang building sa sulod sang walo ka bulan.
Suno diri, sa tion nga makasaylo na ang mga ini mas madasig na ang ila nga pagresponde bangud matawhay na ang ila nga lugar indi kaangay kun sa diin nahamtang ang Police Station 3 sa karun.
Ginapabugal man sini nga kun matapos ang nasambit nga police station isa sila sa may pinakamanami nga building bangud yara ang mga ini sa propedad sang pribado nga kompaniya.
Dako ang pagpasalamat ni Tapang sa Ginoo nga ginsabat ang madugay na sini nga pangamuyo nga may yara na sila sang bag-o nga police station.
Ginpasalamatan man sini ang Rockwell Land Corporation sa gindonate nga duta agud patindugan sang bag-o nila nga building.
Wala man ini nalipat sa pagpasalamat kanday Bacolod City Mayor kag Bacolod City Lone District Representative Alfredo “Albee” Benitez, Bacolod City Lone District Representative kag Mayor Elect Greg Gasataya kag Bacolod City Police Office Director Police Col. Joeresty Coronica sa ila nga mga efforts agud nga matigayon ang proyekto.
Madumduman nga sang Lunes ginpatigayon sang Bacolod City Government kaupod ang Rockwell Land Corporation ang deed of donation signing kag groundbreaking ceremony sang tatlo ka mga bag-o nga emergency facilities nga patindugon sa Buri Road, Barangay Mandalagan, Bacolod City
Ginalakipan ini sang Bacolod City Police Station 3, Bureau of Fire Sub-station, kag command center sang Bacolod City Disaster Risk Reduction and Management (CDRRM).
Ang duta nga pagatindugan sang tatlo ka mga emergency facilities sa ciudad gindonar ini sang Rockwell Land Corporation sa city government nga kun diin may kalapadon ini nga 2,130 square meters.
