Ginpahayag ni Police Regional Office Negros Island Region (PRO-NIR) Regional Director Brigadier General Arnold Thomas Ibay nga gingamit ni Police Staff Sgt. Bonifacio Saycon ang kaugalingon sini nga salakyan sa pagpalagyo nga yara lamang malapit sa Sibulan Municipal Police Station.
Ginkumpirmar ni Ibay nga si Saycon yara sa backseat sang salakyan kaupod ang isa ka pulis.
Apang ang nagadrive amo ang tag-iya sang salakyan nga si Police Captain Jose Edrohil Cimafranca, hepe sang Sibulan Municipal Police Station katupad ang isa pa gid ka pulis.
Suno kay Ibay, nangin mahapos ang pagpangluthang ni Saycon bangud close range lamang ang mga biktima kag kitaon ang tanan sa iya.
Suno diri, personal nga salakyan ang gingamit ni Saycon sa pagpalagyo sa crime scene kag nagpauli pa ini sa ila balay antes nagsungka sa Tanjay Police Station.
Narekober kay Saycon ang duha ka armas luthang nga amo ang 45 caliber pistol nga ginapatihan personal nga armas sini kag isa ka officially issued firearm nga 9mm pistol.
Ang 45 caliber pistol ang iya gingamit sa pagluthang kay Chiela Mae Dinawanao nga serber sa isa ka bar sa Sibulan.
Apang ang 9mm pistol ang iya naman gingamit sa pagtiro sa iya kaupdanan.
Suno kay Ibay, indi pa maathag kun ano ang motibo sa pagpatay ni Saycon kay Dinawanao kag sa mga kaangay sini nga pulis.
