Ginalantaw sang political analyst nga madamo na sang magwa nga whistle blower may kaangtanan sa kontrobersiya sa flood control projects.
Sa interview sang Bombo Radyo Bacolod kay Atty. Jomax Ortiz, masadya na ang nagakatabo sa karun bangud madamo na sang madalig kag maipit kasunod sang entrapment kay Department of Public Works and Highways (DPWH) Batangas 1st District Engineer Abelardo Calalo.
Ini kasunod sang gina-alegar nga pagbayad sang P3.1 million bilang bribe money nga gindeny man ni Calalo kag ginpahayag nga ang nasambit nga kantidad ang donation sang contractor kay Uswag Ilonggo Party-list Rep. Jojo Ang kag ginapahatag lamang kay Batangas 1st District Rep. Leandro Leviste.
Suno abugado mahimo nga gamiton sang gobyerno si Calalo bilang state witness agud nga mahibaluan sa likod sang mga anomalous flood control projects.
Suno kay Ortiz, malawig pa ang ilinaway sang pila ka mga opisyales.
Ginpahayag man sini nga ang mga statements ni Calalo ang mabudlay na nga patihan.
Dugang pa sini nga indi na makadepensa maayo si Calalo sa kaso nga ginpasaka batok diri bangud kahapaw sang iya nga mga rason.
Nahibaluan nga ginpasakaan ni Leviste sang kaso nga Corruption of Public Officials and Violation of the Anti-Graft and Corrupt Practices Act si Calalo kasunod sang gina-alegar nga pagtuyo nga i-bribe ini agud nga untaton ang imbestigasyon sa flood control projects sa Batangas.
