Nagakadapat lamang para sa political analyst ang tinutuyo sang Commission on Election (COMELEC) nga pagpalos sang deadline sa substitution matapos ang filing sang certificate of candidacy (COC).
Sa interview sang Bombo Radyo Bacolod kay Atty Jomax Ortiz, nakaandan na sang iban nga mga kandidato ang magtake-advantage sang kahigayunan sa substitution.
Gindumdom sini nga kaangay man ang ginhimo sadto nanday former President Rodrigo Duterte nga una nga nagpahayag nga indi magpapili, apang naglast minute substitute sa isa ka kandidato.
Kasubong man kay Vice President Sara Duterte, nga ginpapungkuan anay sa iban nga opisyal ang filing sang COC, kag gingamit ang kahigayunan sang substitution.
Nahibaluan nga Oktobre 1 tubtob 8 ang schedule sa filing sang COC, apang tubtob Nobyembre 15 naman ang deadline sang substitution.
Pahayag sang abogado nga ini ang ginagamit sang mga politiko pinaagi sa pagbutang sang mga proxy agud panilagan ang kadidato nga ibutang sang kasumpong.
Tinutuyo ni COMELEC Chairman George Garcia, nga kun luyag gid man sang substitution, ini ang himuon na lamang sa sulod sang schedule sa filing sang COC.
Pinaagi sini, ang ground na lamang para sa substitution amo ang pagkadisqualify ukon kun mapatay ang kandidato.
Sa pihak sang filing sang COMELEC, paathag ni Ortiz nga bisan sin-o ang sarang makakwestyon sa desisyon sang Korte Suprema.
Madumduman nga una na nga gindesisyunan sang Korte Suprema nga unconstitutional ang postponement sa Barangay kag SK elections.
Bangod nakapagkit sa konstitusyon nga ang BSKE ang patigayunon kada tatlo ka tuig, gani bisan ang Presidente ang wala sang diber nga magpostpone sini.
