Ginalantaw nga gamiton ang power transformer nga ginprocure sang Central Negros Electric Cooperative (CENECO) para kuntani sa itukod nga Ayala Substation, para sa pag-ilis sang nagcollapse nga power transformer sang Alijis Substation.
Madumduman nga nagdangat sa 47 mil ang naapektuhan gikan sa pito ka mga Feeders nga konektado sa Alijis Substation kag ang pinaka-nahalitan amo ang service area sang Alijis Feeder 3 nga halos tatlo ka adlaw nga wala sang kuryente.
Sa interview sang Bombo Radyo Bacolod kay Atty. Arnel Lapore, General Manager sang CENECO, ang long term solution sang Negros Electric and Power Corporation (NEPC) sa problema amo ang maislan ang power transformer sang Alijis Substation.
Suno diri ang CENECO ang nakabakal na sang power transformer para kuntani sa itukod nga Ayala Substation nga magacater sa Western part sang Bacolod City, kag sila ang nakabakal na sang lote.
Apang samtang wala pa, ginalantaw ni Lapore nga ang power transformer amo ang gamiton bulos sa Alijis Substation, bangod nagadangat sa anom ka bulan ang procurement kag madugayan ang pag-abot sang pagabaklon sang NEPC.
Mahimo naman nga gamiton ang baklon nga equipment para sa Ayala Substation.
Panindugan ni Lapore nga indi nagid masalbar ang nagcollapse nga power transformer kag ini ang ipull-out na lamang.
Dugang pa sini nga isa sa balantayan amo ang power transformer sang Bago Substation.
Suno kay Lapore ang power transformer sa Bago Substation ang 40 anyos na samtang 13 anyos naman ang sa Alijis Substation nga nagcollapse.
Ang deperensya lamang bangod ang sa Alijis Substation ang Korean-made samtang ang sa Bago Substation ang US-made.
Suno kay Lapore, lesson learned na ang natabo sa Alijis Substation nga indi dapat mangin kampante ang NEPC.
