Aprubado na sang Malacañang ang pagpalawig sang rice import ban tubtob sa katapusan sang tuig agud nga mabuligan ang stability sang farmgate price sang humay.
Suno kay Agriculture Secretary Francisco Tiu Laurel Jr., ipagwa sa Lunes ang Executive Order nga pormal nga nagapalawig sang import suspension.
Ginpahayag niya nga ginrekomendar niya ang extension sa presidente bilang kinahanglanon nga tikang agud nga mahatag ang padayon nga suporta sa local producers, mamentenar ang market stability kag mapahanugutan ang mas kumprehensibo nga assessment sang epekto sang polisa.
Una nga gin-suspend ni President Ferdinand Marcos Jr. ang rice imports sa duha ka bulan ukon tubtob Oktubre 31, agud mabatuan ang dako nga pagnubo sa presyo sang palay antes ang wet harvest season.
