Ginpamatud-an sang mga Pinoy sa Japan ang paglaragway ni Presidente Rodrigo Duterte sa mga Japanese.
Sa keynote address ni Presidente Duterte sa 25th International Conference on the Future of Asia, ginpahayag sini nga luyag niya nga ilugon sang mga Pilipino ang pamatasan sang mga Japanese bangud tampad sila kag nagasunod gid sa kasuguan.
Sa interview sang Bombo Radyo kay Bombo correspondent Josel Palma, ginpahayag sini nga honest, respectful, kag law-abiding ang mga Japanese kun sa diin tanan nga layi ang ila ginatuman.
Mapisan ang mga Hapon suno kay Palma kag conscious sa oras kun sa diin advance sila nagareport sa trabaho.
Ang isa ka minuto nga late suno sa iya ang katumbas na sang 30 minutes samtang ang tatlo ka sunod-sunod nga inadlaw nga pag-absent nga wala nagpahibalo sa employer ang automatic nga magaresulta sa pagpahalin sa trabaho.
Magluwas diri, may word of honor man ang mga Japanese suno kay Palma kun sa diin ginatuman gid nila ang ginpromisa sa husto nga oras kag husto nga adlaw.
Bangud hilway sa korapsyon ang gobyerno sang Japan suno kay Palma, nagaresign gilayon ang gin-akusaran sang pagpangurakot kag kalabanan ang nagapanginmatay bangud sa kahuya.
