Nagpaandam sa publiko si Presidente Rodrigo Duterte batok sa online stores nga nagabaligya sang counterfeit ukon peke nga mga bulong.
Ini matapos nga ginpahayag sang Food and Drug Administration (FDA) nga ila ginamonitor ang pagbaligya online sang mga medisina.
Aminado man si Duterte nga wala ini masyad sang ihibalo sa teknolohiya, apang panugyan sini sa publiko nga mas maayo nga likawan anay ang online stores, ilabi na sa pagbakal sang bulong.
Pahanumdom ni Duterte nga sa karun wala pa naperpekto sa Pilipinas kun paano malagas ang mga kriminal nga nagagamit sang internet.
Dugang pa ni Duterte nga pahanugutan ang mga networks nga mabuhat ang ila nga trabaho kag samtang wala pa sang platform kun sa diin maseguro nga wala sang cheating kag fraud, abiso sini sa mga Pilipino nga magpahilayo anay sa online bangod madamo sang nagapanunto diri.
Ginpahayag ni FDA officer in charge Oscar Guttierrez Jr, nga ang ahensya ang nagakoordinar sa mga online platforms kaangay sang facebook, shopee kag lazada agud nga maseguro nga matuod ang mga over-the counter medicines kasubong man ang mga COVID-19 medications nga mabakal sa mga platforms.
Nag-abiso man ini sa publiko nga magbakal lang sang bulong gikan sa FDA-licensed drug outlets nga nakalista sa ila nga website.
