Pilason ang isa ka priso matapos ginbuno sang kaangay man niya nga priso sa Negros Occidental District Jail sa Bago City kaina kapin alas-7:00 sang aga.
Sa interview sang Bombo Radyo Bacolod kay Bureau of Jail Management and Penology – Negros Island Region Spokesperson Jail Senior Inspector Juniven Umadhay, ang biktima nga residente sang Brgy Villamonte, Bacolod City ang napriso may kaangtanan sa Republic Act 9165 ukon Comprehensive Dangerous Drugs Act of 2002.
Suno diri, kadungan sa sunning time, ginsulod sang apat ka mga priso ang selda sang biktima kag ini ang ginpulihan buno.
Nahingagaw man ini sang jail guards kag gindala sa Corazon Locsin Montelibano Memorial Regional Hospital matapos mag-agom sang multiple stab wounds.
Sa spot report sang NODJ, improvised ice peak ang gingamit, apang wala pa matumod kun tanan nga mga suspect ang nagbuno bangod isa pa lamang ang ila narecover.
Sa recomendation report sang NODJ, ginalantaw nila ang pagseparar sang mga person deprived of liberty (PDLs) samtang sila ang magarequest man sa korte nga masaylo sa lain nga jail facility ang biktima.
Suno kay Umadhay, isa sa ginalantaw nga motibo sa krimen amo ang pagkwestyon sang biktima sa kun paano gingamit ang kwarta sang ila nga pangkat.
Ang pangkat amo ang nagakapot sang nagatiyog sadto nga kwarta sa sulod sang jail facility, nga ginagamit para sa mga programa sang PDLs.
Apang wala man sa apat ka mga suspect ang mga personalidad nga ginakwestyon sang biktima.
Suno kay Umadhay, wala nila ginadula ang posibilidad nga may nagsugo lamang sa apat.
Sa karun ginapaidalom na sa imbestigasyon ang apat, kag ginalantaw ang posibilidad sang pagdugang sang ila ginapangatubang nga kaso.
Pahayag ni Umadhay nga wala na sa karun sang nagalibot nga kwarta sa NODJ bangod ginhimo na nga cashless system sa pagpamuno ni NODJ warden Jail Chief Inspector Crisyrel Awe.
Pasalig man sang NODJ nga pasanyugon pa nila ang greyhound operations kasubong man ang searching sa mga nagasulod nga bisita.
