Nagapangabay man ang sugar farmers nga malakip sa mahatagan sang fuel subsidies.
Sa interview sang Bombo Radyo Bacolod kay Sugar Regulatory Administration Board Member kag Farmer’s Representative David Andrew Sanson, ang dako nga pagsaka sa presyo sang gatong ang nagtuga man sang pagmahal sang abono.
Pahayag sini nga nagahamboy na sa P150 ang ginsaka sa presyo sang fertilizer products.
Luwas diri, may pagsaka man sa trucking fee.
Suno kay Sanson, nagsaka na ang trucking fee para sa hauling sang magsaka ang presyo sang produktong petrolyo nakaligad nga semana.
Gani ginalauman nga ini ang magasaka pa sa panibag-o nga bigtime fuel price hike.
Dugang pa nga magadako ang gastos sang mga sugar farmers nga nagagamit sang mechanical equipment kaangay sang traktora, kasubong man ang water pumps.
Nagpadala na ini sang request kay Agriculture Secretary Francisco Tiu Laurel Jr. nga mapalab-ot kay President Ferdinand “Bongbong” Marcos Jr. nga malakip sa mahatagan sang fuel subsidy ang mga sugar farmers.
Nahibaluan nga sa karun, ang ginahikot nga fuel subsidies ang para pa lamang sa mga transport sector.
Dugang pa sini nga dapat mapreparahan sang nagakaigo nga fuel supply sang gobyerno ang mga sugar farmers sa kaangay nga fuel crisis agud makapadayun ang produksyon.
