Mabuhin-buhinan ang palaligban sang mga motorista subong nga semana bangud nagpatuman sang oil price rollback ang mga oil firms kasunod sang pila ka semana nga asod asod nga pagsaka sang presyo sang produktong petrolyo.
Sa separado nga advisories, ang Seaoil Philippines Corp kag Shell Pilipinas Corp. ang nagpatuman sang pagnubo nga P0.50 sa kada litro sang gasoline; P0.70 sa kada litro sang diesel kag P0.85 sa kada litro sang kerosene.
Nagpatuman naman ang Petro Gazz sang pareho nga price adjustments magluwas nalang sa kerosene nga wala sa ila nga produkto.
Nagtake effect ang price adjustment alas 6:00 ang takna kaina sang aga, Oktubre 22.
Suno kay Rodela Romero, direktor sang Oil Industry Management Bureau ang pagnubo sa presyo sang produktong petrolyo ang bangud sa paghagan-hagan sa tensyon sa Middle East, paghina sang ekonomiya sang China kag ang pagnubo sang demand sang produktong petrolyo.
Sang nakaligad nga semana nagpatuman sang price hike nga P2.65 sa kada litro sang gasolina; P2.70 sa kada litro sang diesel kag P2.60 sa kada litro sang kerosene.
Humalin sang Enero subong nga tuig ang net increase sang gasolina ang nagdangat sa P9.05 sa kada litro sang gasolina kag P6.75 sa kada litro sang diesel kag net decrease nga P2.75 sa kada litro sang kerosene as of October 15, 2024.
