Madugangan naman ang kabudlayan sang mga motorista matapos nga nagpatuman naman sang oil price hike ang mga oil companies.
Sa separado nga advisories, nagpatuman ang Seaoil Philippines Corp. kag Shell Pilipinas Corp. sang pagsaka nga P0.50 sa kada litro sang gasolina, P0.30 sa kada litro sang diesel kag P0.70 sa kada litro sang kerosene.
Magapatuman man sang pareho nga price adjustment ang Cleanfuel magluwas nalang sa Kerosene nga wala sa ila nga produkto.
Epektibo alas 6:00 ang takna subong nga aga ang price adjustment sa tanan nga oil firms magluwas lamang sa Cleanfuel nga magapatuman sang price adjustment alas 4:01 ang takna karun sa hapon.
Una na nga ginlantaw sang Department of Energy-Oil Industry Management Bureau (DOE-OIMB) nga ang pagsaka sang presyo sa produktong petrolyo subong nga semana, ang resulta sang nagasanyog nga geopolitical tensions kag gilayon nga paguntat sang Libyan oil production kag exports.
Sang tinalikdan nga semana, madumduman nga nagpatuman ang mga oil firms sang pagnubo sa presyo sang produktong petrolyo kun sa diin P1.15 sa kada litro sang gasolina; P1.90 sa kada litro sang diesel kag P1.80 sa kada litro sang kerosene.
Humalin sang Enero subong nga tuig, nagdangat ang net increase sa gasolina sa P6.90 sa kada litro kag P4.05 sa kada litro sang diesel kag net decreaase nga P4.00 sa kada litro sang kerosene as of August 27, 2024.
