Nagsaka sang P8.64 ang presyo sang karne sang baboy sa bilog nga probinsya sini nga semana.
Sa interview sang Bombo Radyo Bacolod kay Dr. Renante Decena, pinuno sang Provincial Veterinary Office (PVO), ginpahayag sini nga nagahamboy karon sa P213 ang average prize sang karne sang baboy provincewide.
Mas mataas ini sang sulusobra sa P8 kun ipaanggid sa presyo sang tinalikdan nga semana nga P204.76.
Pinakamataas naman nga presyo sang kada kilo sang karne sang baboy amo ang sa ciudad sang Bacolod nga yara sa P245 kag P240 naman sa Valladolid kag Pulupandan samtang ang pinakamanubo naman ang sa Talisay City nga yara lamang sa P185 kag sa Ilog, Isabela kag La Castellana nga nagahamboy sa P190 ang kada kilo.
Suno kay Decena, nagadepende sa presyo sang buhi nga baboy ang presyo sang karne sini.
Base sa ila nga monitoring, nagabili sang P150 per kilo live weight sa auction market ang buhi nga baboy samtang P180 per kilo live weight naman sa commercial piggery.
Dugang pa sini nga sugod sang early January pa nag-umpisa ang pagsaka sang presyo sang karne sang baboy bangud nga nagsaka man ang presyo sa Luzon.
Ini ang epekto sang African Swine Fever nga nagtuga sang pagdula sang 4 million ka mga baboy sa Pilipinas sang tinalikdan nga tuig.// Suno kay Decena, 8 million ka mga baboy nalang karon ang nabilin sa pungsod.
Nagadangat naman sa masobra tunga sa milyon ang baboy sa Negros Occidental.
Ginpasalig ni Decena nga bastante ang suplay sang baboy sa probinsya.
Samtang, nagsaka naman sang 30% ang konsumo sang baboy sa probinsya sang nagligad nga tuig kun ipaanggid sang 2019.
