Nagsaka ang presyo sang prutas sa karun nga nagahilapit ang Bag-ong Tuig.
Suno kay Aida Dechillen, 82-anyos kag manugbaligya sang prutas sa Bacolod Public Plaza, sang Paskwa, indi gid maayo mabakal ang prutas kun ikumparar sang nagliligad nga mga tuig bangud pigado gid ang mga tawo apang maskin paano, suno sa iya, nakabenta man ini.
Suno kay Dechillen, sadto, ang mansanas ang mabakal lamang sa presyo nga lima ka pesos kada isa apang sa karun, ini ang nagabalor na sang P10 tubtob P15.
Ang orange sadto ang mabakal lamang sa P10 apang sa karun P20 na ini ukon tatlo for P100.
Ang grapes nga may liso ang mabakal sa P200 samtang ang seedless ang P250.
P180 naman ang kada kilo sang paho.
Ang peras kag sunkiss ang ginabaligya sa presyo nga 3 for P100.
Ang ponkan ang mabakal sa P10 kada isa ukon 2 for P25.
P200 naman ang kada kilo sang strawberry samtang P200 naman ang pomelo
Nagahimo man ini sang fruit basket kun sa diin sarang nga makapili ang mga customer sang ila luyag nga prutas sa balor nga P500 tubtob P1,000.
Nagalaom si Dechillen nga maubos ang ila baligya sa Bag-ong Tuig agud makita man nila ang ila ginansya kag kapital.
