Magapatuman sang price freeze sa Bacolod City kasunod sang deklarasyon sang State of Calamity bangod sa halit sang Bagyo TINO.
Sa interview sang Bombo Radyo Bacolod kay Bacolod City Councilor Atty Caesar Distrito, ang deklarasyon ang nagahatag sang gahom sa local government unit kag Department of Trade and Industry nga makapatuman sang price freeze sa mga basic kag prime commodities.
Kun sa diin ang presyo sang mga balaklon antes ang kalamidad ang dapat mapabilin kag indi magtaas.
Suno kay Distrito, may mga negosyante nga nagapamintaha sa kalamidad para sa ila personal nga ganar.
Pahayag sini nga tanan ang naga-antos sa kalamidad, apang imbes nga magbulig, may mga unscrupulous nga negosyante nga nagapamintaha.
Kalakip sa mga nareport nga nagsaka ang presyo amo ang kandila kag tubig, kasubong man ang hotel accomodations.
Isa man sa ginakahangaw-an nga magsaka ang presyo amo ang constuction materials ilabi na nga madamo sang mga nagub-an sang balay.
Suno kay Distrito nga ang madakpan nga nagalapas sa price freeze ang sarang mapriso kag pamultahon depende sa desisyon sang korte.
Sarang man nga ipasarado ang negosyo kag irevoke ang business permit bangod sa bayolasyon sa price control law.
Nagpagwa man sang pahanumdom ang alkalde tuhoy sa pagpabilin sang presyo.
Sa statemet ni Bacolod City Mayor Greg Gasataya, karun nga yara sa State of Calamity ang ciudad, mapabilin ang presyo sang mga balaklon sa pre-disaster pricing.
Ang pagsunod diri ang makabig nga paagi naman agud indi magdugang ang pag-antos sang mga Bacolodnon, Concessionaires kag Consumers.
