Ginpasalig sang principal sang eskwelahan sang biker nga si Rolly Ray Alejo nga indi nila pagpabay-an nga maapektuhan sang pagtuon sini kasunod sang insidente sang Oktubre 2 kun sa diin ginpainom niya sang tubig nga halin sa turugban sang karbaw ang biker nga si Khylie Nicole Montecado.
Sa interview sang Bombo Radyo kay Zenith Avila, kaina sang aga lang niya nahibaluan ang ginhimo ni Rolly Ray Alejo.
Nakibot ni Avila sa ginhimo ni Alejo kag aminado ini nga indi tolerable ang ginhimo sang estudyante.
Bilang school principal sang eskwelahan ni Alejo, nag-appeal si Avila nga indi pagdalahigon ang eskwelahan bangud weekend natabo ang insidente kag indi sanctioned sang Department of Education ang aktibidad.
Suno diri, nagabug-at ang iya balatyagon sa tion nga idrag ang ngalan sang Emiliano Lizares National High School sa hitabo.
Ginakasubo ni Avila nga beyond control na sang eskwelahan ang ginhimo ni Alejo gani indi na kuntani pag-idrag ang buluthuan bangud ginatipigan nila ang ngalan sang high school.
Suno diri, indi tolerable ang ginhimo sang Grade 12 student apang may proper forum ukon venue para sa kun anuman nga legal remedy ang ginaplano sang ginpainom sang mahigko nga tubig nga si Khylie Nicole Montecado.
Suno sa adviser ni Alejo, indi salawayon sa eskwelahan ang estudyante kag wala sang record nga problema ini sang buluthuan.
Halin sang Lunes, wala na gid ini nakasulod sa klase kag nakabaton man ini sang impormasyon nga natraumatize ang bata kag wala na nagagwa sa ila nga balay.
Sa pihak sang ginhimo ni Alejo, ginpasalig ni Avila nga tinguhaan nila nga buligan nila ang estudyante nga indi ini magbiya sa pag-eskwela kag indi ini pagpabay-an nga mag-untat.
Suno sa principal, may mga tinion nga makahimo sang isa ka butang ang mga pamatan-on nga wala nila napanumduman kun ano ang mangin epekto sini.
