Ginbalik sang Sangguniang Panlungsod ang proposal letter sang Bacolod Traffic and Transport Management Department sa pagpasaka sang permit fee para sa fun run activities sa balor nga P10,000 tubtob P100,000 gikan sa karun nga P100.
Sa interview sang Bombo Radyo Bacolod kay Bacolod City Councilor Al Victor Espino, chairperson sa Committee on Law and Ordinances sa Sangguniang Panlungsod, ginbalik ang proposal bangod ini ang wala naglabay sa husto nga proseso.
Paathag sini nga wala sang otoridad ang BTTMD nga derekta maghatag sang proposal sa City Council, sa baylo kinahanglan anay sang mga ini magpatawag sang Bacolod Traffic Authority Council (BTAC) meeting.
Nahibaluan nga si Bacolod City Mayor Greg Gasataya amo ang nagaserbe nga chairman sa BTAC.
Panindugan sini nga kinahanglan anay madeliberate ang proposal antes malakip sa regular session sang City Council, kag indi pwede nga si BTTMD Officer in Charge Atty Reuben Sabig lamang ang magadesisyon.
Suno kay Espino, ginpamangkot man sini si Mayor Greg angot sa proposal, apang ang alkalde ang nakahibalo lamang angot diri sang siya ang ginpamangkot sang media.
Dugang pa ni Espino nga bilang OIC sang isa ka departamento, mas pormal kuntani kun nagrequest ini sang kopya sang ordinansa sa counterpart sini sa Cebu nga amo ang iya ginbasihan, apang si Sabig ang naggamit lamang sang news articles nga ginbasihan sini sa proposal.
Nahangpan man sini nga tuman na ka gamay sang P100 nga permit fee kag kinahanglan na nga ma-amyendahan.
Nahibaluan nga sa proposal sang BTTMD, luyag nila nga pasakaon ang permit fee sa minimum nga P10,000 tubtob P20,000 sa below 10km race; P50,000 sa masobra 10km tubtob 21km; P75,000 sa masobra 21km tubtob 42km; kag P100,000 kun maglapaw sa 42km.
Ang proposal ang wala naman ginkumpormihan ni Mayor Greg nga para sa iya tuman ka dako, kag ginaduso lamang ang resonable nga permit fee.
