BACOLOD CITY-Nagpaandam ang lokal nga panguluhan sang Negros Oriental batok sa mga nagapalapta sang fake news.
Ini ang kasunod sang paglapta sang balita kahapon sang udto nga gin-lockdown ang Negros Oriental Provincial Hospital matapos nga nagpabulong diri ang staff sang isa ka hotel kun sa diin nagtiner ang 38-anyos nga babaye nga una nangin positibo nga kaso sang 20019 novel coronavirus acute respiratory disease (nCov-ARD) kag ang upod sini nga 44-anyos nga una nga fatality sa guwa sang China.
Apang santo sa pagpangusisa, indi matuod ang balita kag ini ang nagtulod sa Provincial Information Office sa pagpamuno ni Bimbo G. Miraflor nga magpaguwa sang paandam batok sa mga nagaplapta sang sala nga impormasyon.
Santo sa pahibalo sa publiko sang Provincial Information Office, ginapanumduman na nila karun ang pagpasaka sang panumbungon batok sa mga indibidwal nga nagapalapta sang fake news pinaagi sa Facebook, Twitter, kag iban pa nga social media platforms ilabi na ang tuhoy sa (2019-nCoV ARD) incident sa probinsiya.
Santo pa sa pahibalo, may yara sang mga datos nga dapat confidential kag katungdanan sang gobyerno nga proteksyunan ang nasambit nga mga detalye.
Kadungan sini, ginapasalig sang provincial government nga magagikan lamang sa Department of Health kag Integrated Provincial Health Office ang ipaguwa nila nga opisyal nga statement para sa publiko.
