BACOLOD CITY — Isa ka committee hearing ang patigayunon subong nga semana sang committee on budget and finance sa Sangguniang Panlalawigan sang Negros Occidental may kaangtanan sa panibag-o naman nga supplemental budget sang provincial government subong nga tuig.
Ang P300 milyones nga supplemental budget ang napaidalom na sa first reading sa session sang nagligad nga semana kag ini ang igabayad sa duha ka lote nga ginbakal sang probinsya agud gamiton sa pila ka mga purposes.
Suno kay 2nd District Board Member Salvador Escalante, chairman sang committee on budget and finance, igapatawag sa committee hearing ang mga departamento nga natungdan.
Diri hibaluon kun pila ang alokasyon nga igapa-in sa tagsa ka duta.
Nahibaluan nga ang lote nga baklon sang provincial government ang ginalakipan sang 25 ektariya sa Barangay Matab-ang, Talisay City kag 40 ektariya sa Barangay Mansilingan, ciudad sang Bacolod.
Ini ang nagabalor tanan sang P485 milyones apang nakabayad na sang tag-P30 milyones nga downpayment ang probinsya sang ginpaidalom sa expropriation ang mga propiedad.
