Nagpaandam ang Philippine Statistic Authority Negros Occidental Office nga indi magpati sa mga modus nga nagatanyag sa madasig nga paghatag sang National ID.
Ini kasunod sang mga report tuhoy sa madamo na nga nabiktima sang nagahimo sang peke nga PSA ID nga nagatanyag sa mga nagapila sa gwa sang PSA office kabaylo sang bayad.
Sa interview sang Bombo Radyo Bacolod kay Diesah Biaoco, officer in charge sang PSA Negros Occidental, ang PSA gid lamang ang maka-print sang paper form sang National ID.
Dugang pa sini nga wala sang bayad ang pagkuha sang paper form sang National ID, gani indi dapat magpati sa mga nagapanukot sang P200 tubtob P900 para sa madasig nga proseso.
Suno diri, matumod ang mga peke bangod ini ang indi mascan kag indi konektado sa egov.ph kun sa diin nakasave ang mga data.
Dugang pa sini nga kun nakaregister na apang wala nakaabot ang physical ID, indi na magparehistro liwat bangod ini ang nagapadugay lamang.
Suno kay Biaoco, ang rehistrado na ang indi na pwede liwat marehistro, gani dapat nga dal-on na lamang ang transaction slip sa una nga pagrehistro kag magrequest sang paper form sang national ID.
Luwas sa mga scammer nga nagatanyag sang peke nga National ID, may-ara man sang mga report tinalikdan nga bulan nga may mga nagatawag kag nagapangayo sang mga personal details, accounts kag transaction code bilang confirmation sa PSA.
Paandam ni Biaoco nga wala sila sang kaangay nga proseso, kag mahimo magamit ang identity sa pagpanunto sa iban kaangay sa paggamit sini sa loans.
