Nagpanawagan ang Philippine Statistics Authority (PSA) Negros Occidental sa mga pumuluyo nga maghulat na lamang sa schedule sang registration sang National ID sa tagsa ka Local Government Unit (LGU), kag indi na magkadto sa ila opisina sa Bacolod City.
Sa interview sang Bombo Radyo Bacolod kay Diesah Biaoco, Officer-in-Charge sang PSA Negros Occidental, nagapangayo ini sang pasaylo sa mga nagkadto kag wala na na-cater sang PSA bangud naubos na ang mga numero tubtob sang Miyerkules kuntani nga schedule tuga sang kadamuon sang nagkadto para sa registration.
Suno kay Biaoco, may ara sila sang patigayunon nga “one-time big time registration”, sa diin ang ahensya mismo ang magakadto sa mga lokal nga panguluhan kaupod ang DSWD.
Nagpasalig naman ang PSA nga makadtuan gid ang kada LGUs gani maghulat lang ang mga maparehistro sa iga-anunsyo nga schedule sa ila nga lugar.
