Ginkumpirmar sang hepe sang La Carlota City Police Station nga ang anay miyembro sang Philippine National Police nga ginakabig bilang national most wanted person ang nagatindog nga pinuno sang isa ka crime group sa Region 8.
Madumduman nga sang Pebrero 8, naaresto sa probinsya sang Negros Occidental ang anay pulis nga nagapangatubang sang madamo nga kaso kag ginakabig bilang national most wanted person.
Sa report nga ginpagwa sang PNP, si Anecio Lapara Jr. alyas Dondon ukon Junior Pulis ang naaresto sa Lapaz Street, Barangay 1 Poblacion, La Carlota City, Negros Occidental, alas-8:30 sang Lunes.
Siya ang naaresto sang gintingob nga pwersa sang Special Operations Division kag Regional Intelligence Unit-6; PNP-Integrity Monitoring and Enforcement Group; La Carlota City Police Station; kag 1st kag 2nd Negros Occidental Police Mobile Force Company.
Nag-upod man sa operasyon ang mga tiglawas sang Regional Intelligence Division sang Police Regional Office 8; Leyte Police Provincial Office; 2nd Leyte Provincial Mobile Force Company; Merida Municipal Police Station; Provincial Intelligence Unit sang NOPPO; Criminal Investigation and Detection Group Region 6 kag Ormoc City Police Office.
Si Lapara ang nagapangatubang sang tatlo ka separado nga criminal cases para sa kaso nga robbery, robbery in bond kag illegal possession of firearms.
Siya ang nagpalagyo sa Bureau of Jail Management and Penology facility sa Ormoc City samtang nagapadayon ang trial sa iya nga mga kaso.
Sa interview sang Bombo Radyo kay Police Lt. Col. Jonel Guadalupe, ginpahayag sini nga wala sang pangalan ang crime group sang suspetsado sa Region 8 kun sa diin nagapatigayon sila sang mga illegal nga aktibidad kaangay sang robbery kag hold up.
May kaso man ini nga frustarated homicide.
Suno kay Guadalupe, sang ini ang nagpalagyo sa Region 8, nagpadulong ini sa Manila apang bangud ang iya bayaw ang naga-ubra sa central sa La Carlota, diri na lang siya nanago.
