Dakop sa akto nga nagahithit sang dried marijuana leaves ang isa ka pulis sa iya nga boarding house sa ibabaw sang barangay hall sang Barangay 37 ciudad sang Bacolod kahapon sang hapon.
Sa interview sang Bombo Radyo Bacolod kay P/ Maj. Jovil Sedel, hepe sang Police Station 1, mismo ang field training officer ni Patrolman Bryn Jephthah Gimotea, 32-anyos ang nakadakop sa iya nga nagahithit sang marijuana.
Nahibaluan nga nagpanyaga ang FTO sang suspetsado samtang ini naman ang nagpadulong sa iya nga boarding house.
Sang pagsaka sang FTO sini sa iya nga boarding house, didto na kag may napanimahuan ini nga lain.
Ginsulod sini ang hulot ni Gimotea kag dakop sa akto sini nga nakita ang suspetsado nga nagabitbit sang improvised pipe nga may dried marijuana leaves.
Suno kay Sedel, si Gimotea ang kabahin kuntani sang field training program sang Philippine National Police agud mangin permanente sa trabaho.
Na-recruit ini sang tuig 2014 apang nag-untat sa pagka-pulis sang tuig 2015 bangud na-aksidente ini.
Nagpanumbalik lamang ini sa serbisyo sang tinalikdan nga tuig.// Nakahunong ini sa karon sa Police Station 1 kag natalana nga pasakaan sang kaso.
