Ginkumpirmar sang spokesperson sang Police Regional Office – Negros Island Region nga isa ka police personnel nga na-assign 3rd Maneuver Platoon sang 1st Negros Occidental Provincial Mobile Force Company ang napatay matapos gintiro sang makapila ka beses sang ginabanta anum nga mga persona sa Purok 5, Brgy. Laga-an banwa sang Calatrava, Negros Occidental Disyembre 7.
Ginkilala ang biktima nga si Police Senior Master Sergeant Rommel Aguilar.
Sa interview sang Bombo Radyo Bacolod kay Police Lt. Col. Joem Malong, una nga nagluntad ang isa ka shooting incident alas 7:05 sang aga, Dominggo sa Sitio Tagda sa Barangay Dolis sa nasambit nga banwa kag ang biktima ang isa ka 58 anyos nga lalaki.
Ang nasambit nga biktima ang nagahimos kuntani padulong sa simbahan sang hinali lang gintiro sang anum ka mga armado nga persona sa ulo sang makaduha ka beses.
Ang mga suspek ang nagpalagyo sa nabukid nga bahin sang Barangay.
Gilayon man nga ginrespondehan sang mga kapulisan sang Calatrava Municipal Police Station sa pagpanguna sang Acting Chief of Police nga si Police Captain Jesus Alba.
Suno kay Malong, alas 10:50 sang aga, ginreport naman nga ang mga personnel sang 3rd Maneuver Platoon sang 1st Negros Occidental Provincial Mobile Force Company ang nakaengkwentro sang anum ka mga armado nga mga persona samtang nagapatigayon sang warrant operation sa Brgy. Menchaca.
Suno kay Malong, ginapatihan nga ang anum ka persona amo man ang nagtiro sa 58 anyos nga biktima Barangay Dolis.
Bangud sa engkwentro, nag-disperse ang mga katapo sang NOCPMFC kun sa diin nadula si Aguilar.
Kapin alas 12:30 sang udto, nakabaton sang tawag ang Calatrava Municipal Police Station halin kay Barangay Kapitan Vicente Maquiller nga may bangkay nga nasapwan sa Purok 5, Brgy. Laga-an nga nakumpirmar nga si Aguilar.
Ginpahayag man sang mga residente nga nagpangayo pa sang tabang si Aguilar apang ini ang liwat nga ginpaulanan sang bala sang anum ka suspect.
Ang insidente ang ginkasubo naman sang kabug-usan nga Police Regional Office – Negros Island Region.
Gilayon man nga nagpadulong sa Calatrava si Negros Occidental Police Regional Office (NOCPPO) Director Police Col. Dennis Wenceslao agud nga tsekyaron ang sitwasyon.
Ginkondenar man sang provincial director ang asod asod nga shooting incident.
