Nafile na ang duha ka counts sang murder kag isa ka frustrated murder batok kay Punong Barangay Arnie Benedicto sang Barangay Lantad, Silay City nga prime suspect sa pagpangluthang sa Sitio Ipil-Ipil, Brgy Mambulac, Silay City, Negros Occidental sa adlaw sang eleksyon.
Ang mga napatay ang ginkilala nga sanday Albert Salimbot, yara sa legal nga edad, residente sang Hda. Macamig Pulo, Brgy E. Lopez kag Ronnie Piedad, 45 anyos, residente sang Zone 7, Purok Ipil-Ipil, Brgy Mambulac samtang ang mga pilason naman ang ginkilala nga sanday Ruel Espinosa, 42 anyos, sang Purok Highway, Zone 15, Talisay City; Ric Ortillano, 46 anyos, residente sang Hofileña Subd, Brgy Mambulac; Wilfredo Cuello, 46 anyos, residente sang PLDT Baybay, Brgy Mambulac; Jason Belleza, legal ang edad, residente sang Yolanda Housing, Brgy E. Lopez; Joey Pomares, residente sang Brgy Mambulac; Glenn Gutierrez, 49 anyos, residente sang Cabay Bodegam Brgy Guinhalaran, kag may isa pa nga wala nakuhaan sang identity.
Samtang magluwas kay Punong Barangay Benedicto, may duha pa ka mga persona nga nagbulig sa paghimo sang krimen.
Sa interview sang Bombo Radyo Bacolod kay Negros Occidental Police Provincial Office Spokesperson Police Captain Judesses Catalogo, ang napasaka pa lamang nga kaso paagi sa inquest proceedings ang gikan sa pamilya sang duha nga napatay kag sa isa nga nakagwa na sa ospital.
Apang may anom pa nga yara sa ospital ang mahimo man nga magfile sang dugang nga kaso, apang magalabay na sa regular filing.
Samtang, ginpull-out naman ang mga kapulisan nga nagabantay sa gwa sang balay nga ginapahayag ginagamit nga head quarters sang Team Asenso matapos wala gingrant sang korte ang request sa search warrant.
Madumduman nga ang mga napatay ang miyembro sang Team Ugyon nga nagamonitor sa gina-alegar lapnagon nga vote buying activity.
Pag-abot ni Punong Barangay Benedicto, siya ang nagsulod sa balay, kag naggwa upod sa duha kag ginpaarakan sang luthang ang mga biktima.
Ang Punong Barangay ang nagpalagyo apang nagsungka man sa Criminal Investigation and Detection Group samtang ang duha ka suspect ang ginapahayag nagapanago lamang sa balay.
Suno kay Catalogo, wala nakompleto ang ginapangayo nga requirement sang korte agud mahatagan sang search warrant gani ginpull-out na lamang nila ang mga police personnel sa area.
