Nagpanindugan ang Punong Barangay sang Brgy Handumanan, Bacolod City nga ginpasugtan sini nga magtinir ang mga dancers sa Masskara Arena and Street Dance competition nga magtulog sa sulod sang Brgy Hall.
Ini matapos mag-trending sa social media ang post sang isa ka dancer nga nag-ayo sila nga magtulog sa Brgy hall.
Ini bangud malayo pa ang ila paulian apang wala sila ginpahanugutan.
Sa interview sang Bombo Radyo kay Punong Brgy Ma. Febe Legaspi, kahapon sang aga naesturya na sini ang mga dancers kag ginpasalamatan.
Suno diri, kalabanan sa mga dancers nakapauli na sa ila tagsa ka mga lugar apang may iban nga naghambal nga malagaw anay sa ciudad.
Kagab-i, nakabaton siya sang tawag nga may isa ka dancer nga residente sang banwa sang Isabela ang nag-ayo nga matulog sa Brgy hall kag iya man ini ginpasugtan.
Apang sang kaagahon na, didto lang sini nahibaluan nga may pagbinaisay nga nagluntad sa tunga sang Brgy Tanod kag sa dancers kag designer.
Pahayag ni Legaspi, magluwas sa dancer nga taga-Isabela may nag-abot nga tatlo pa gid ka dancers, duha nila ka barkada kag isa ka designer.
Wala sila ginpahanugotan nga magsulod sa Brgy Hall kag iban sa ila yara sa impluwensya sang makahulubog nga ilimnon.
Bangod sini nagdesisyon na lamang sila nga magtulog sa balay sang isa nila ka kakilala nga dancer man.
Suno sa Punong Brgy, nagapangayo ini sang pasaylo sa natabo bangod una na nga nagpati ang Brgy Tanod nga nakapauli na ang mga dancers.
Gin-athag man sini nga wala man ginpabay-an ang mga dancers kag akomodar man sila sang insakto.
