Ginreklamo sang isa ka botante sa barangay 38, Bacolod City ang pagkakas sang Punong Barangay sang iya pangalan sa Tulong Panghanapbuhay sa Ating Disadvantaged/Displaced Workers (TUPAD) beneficiaries.
Paagi sa Ipa- Bombo Ta segment, ginreklamo ni Ninfa Caballero si Punong Barangay Gener Agpalo.
Suno kay Caballero, siya ang naggikan sa Brgy 35 kag nagsaylo lamang sa barangay 38 kun sa diin didto na siya narehistro bilang botante.
Suno diri, kada barangay kagawad may quota nga lima ka tawo nga ilista nga mangin benepisyaryo sang TUPAD.
Suno kay Caballero, ginlista siya ni Kagawad Rosemarie Occianas apang ginkakas ni Agpalo ang iya pangalan.
Pahayag sini, sang tinalikdan nga tuig ang nakalista sa quota ni Occianas amo ang iya ihado kag ginkasugtan nila nga bisan pangalan sang ihado ni Occianas ang nalista, si Caballero ang magatrabaho kag tunga lang sila sa kwarta.
Ang P4,800 nga nabaton sang ihado ni kagawad gintunga nila ni Caballero kun sa diin P2,000 ang sa ihado bangod iya pangalan ang nakalista kag P2,800 ang kay Caballero nga amo ang nagtrabaho.
Subong nga tuig, iya na mismo ni Caballero pangalan ang ginpasa ni Occianas apang wala siya nadala sa lista nga ginpasa sa Department of Labor and Employment (DOLE) kag nagapanindugan ini nga napasa niya ang tanan nga ginapangayo nga requirements.
Nagpadulong na si Caballero sa Public Attorney’s Office (PAO) kag DOLE kag ginpasa na sini ang letter sang PAO sa barangay nga nagapangayo sang explanation kun ngaa nakakas ang pangalan niya sa lista.
