Nagapasalamat ang punong barangay sang Barangay Taculing subong man ang presidente sang Liga ng mga Barangay sa ciudad sang Bacolod sa positobo nga response sang iya mga residente sa “no segregation, no collection” policy.
Nahibaluan nga ang Barangay Taculing ang isa sa 12 ka mga pilot areas nga nagpatuman sang nasambit nga polisa humalin sang Marso 1.
Suno kay Liga ng mga Barangay president Lady Gles Gonzales-Pallen, nagadangat na sa 60% ang compliance sang Barangay Taculing sa pagsegregar sang madunot kag indi madunot nga mga basura.
Nagsaka man suno sa iya ang compliance sang ila barangay sa mga nagakadto sa Material Recovery Facility (MRF) agud magdul-ong sang mga basura nga pwede pa ma-recyle.
Suno kay Pallen, mabudlay ang nasambit nga polisa kun indi pagsugudan apang nagapati siya nga sa amat-amat nga pagpatuman sini, mangin mahapos na lamang ini.
Sa karon suno sa Liga ng mga Barangay president nga wala pa man siya sang may nabaton nga reklamo sa apat ka adlaw nga pagpatuman sang “no segregation, no collection” policy.
