Padayon pa nga ginatumod sang kapulisan ang rason sang pagpanginmatay sang kapitan sang Brgy. Mabato Ayungon, Negros Oriental kun sa diin ginpatay sang New People’s Army (NPA) ang apat ka mga pulis.
Una diri, nasapwan na lamang nga nagahayangon kag nagasuka na si Punong Barangay Sunny Caldera, 51-anyos, sa balay nga temporaryo sini nga gina-istaran sa Brgy. Awaan sang Hulyo 22 sang hapon.
Suno sa hepe sang Ayungon Municipal Police Station nga si Police Major Rommel Luga, nag-inom sang pesticide ukon hilo sa peste ang punong barangay.
Sang nasapwan si Caldera gilayon ini nga gindala sa Bindoy District Hospital kag ginsaylo sa hospital sa Dumaguete apang pasado alas-11 kahapon sang aga sang ginbawian ini sang kabuhi.
Sa karun, padayon nga ginatumod sang Ayungon police ang motibo sang biktima sa pagpanginmatay kag indi nila mahambal nga may kaangtanan gid ini sa pagkamatay nanday Police Corporal Relebert Beronio, Patrolman Raffy Callao, Patrolman Roel Cabellon, kag Patrolman Marquino de Leon apang posible isa ini sa mga anggulo.
Madumduman nga sa press conference nagligad nga semana ni Police Regional Office (PRO) 7 director Police Brigadier General Debold Sinas, ginpahayag sini nga lantawon ila kun may kapaltahan ang punong barangay sa pagpatay sa apat ka mga pulis bangud wala niya ginpahibalo ang mga ini nga kuta sang mga rebelde ang Brgy. Mabato.
Nagaduda man ang hepe nga posible wala nasarangan ni Caldera ang krtisismo kag pagpasibangod sa social media nga naagom sini matapos ang pagpatay sa apat.
