Naghatag sang pahanumdom ang purok chairman sang Purok Lison, Brgy 1, ciudad sang Bacolod sa paggamit sang kandila kasunod sa nagluntad nga sunog kun diin napatay ang duha ka menor de edad kaina sang kaagahon.
Sa interview sang Bombo Radyo kay Andy Brizuela, kapin alas- 9:00 kagab-i, may nagluntad nga brownout kag mga alas- 11:00 ang takna kagab-i nagahulat sila sa pag-abot sang Negros Power sang nakita sini ang mag-utod nga nga nagahampang sa basketball court kaupod man ang iya bata
Ang magulang amo si Gabry Jhon Gutierrez kag ang manghod sini amo si Audrey Shantel Gutierrez.
Ginsaway sini ang mag-utod nga magpauli bangod nga gab-i na kag basi mabunggoan pa ang mga ini sa dalan.
Pasado ala- 1:00 kaina sang kaagahon, nagluntad ang sunog apang mga alas- 2:19 na nakatawag sa BFP bangod nagpanic na ang mga tawo kag nagbinuligay sa pagbasya sang tubig.
Matapos ang duha ka minutos, naka-abot ang BFP nga nabudlayan pa sa pagsulod sa area.
Suno kay Brizuela, ang duha ka bata nagakatulog sa ila balay apang pasado ala- 1:00 sang kaagahon naggwa ang iloy para magbakal sang pamahaw kasunod sa request man sang iya bata nga suno sa iloy mahimos sila alas- 3:00 para magbyahe padulong sa Iloilo.
Samtang, ang amay naman sang duha ka bata ang naglakat kag wala nakabalik.
Nahibaluan naman nga nagbulagay na ang amay kag iloy sang duha ka bata kag wala na naga-upod pa apang ang iloy kag ang mga bata nagapuyo sa isa ka balay samtang ang amay naman ang nagpuyo man sa pihak nga balay sa kaangay lang man nga compound nga ang duta ginapanag-iyahan sang pamilya sang amay.
Kun maglakat ang iloy ginabilin sini kun kaisa ang iya mga bata sa amay kag sa lolo.
Kaina, gindala sa ospital ang si Edwardo Gutierrez, ang lolo sang mga bata nga naga-edad sang 63 anyos nga nagtuyo pa kuntani nga salbaron ang mga bata kag nag-angkon sang 2nd degree burn sa natuo nga kamot kag guya kag 1st degree burn sa nawala nga kamot samtang ang bangkay naman sang duha ka bata nakita nga magkatupad malapit na sa pertahan sang balay.
