BACOLOD CITY — Nag-deploy na ang Department of Agriculture sang quarantine personnel sa Bredco Port agud magbulig sa pagbantay sang pagsulod sang poultry products paagi sa mga nagadungka nga barko.
Suno kay Bacolod City Veterinarian Dr. Maria Agueda Trinidad dela Torre, nagdangop ini sa DA-Negros Island Region agud buligan sila sa pag-monitor sang nagasulod nga itlog kag karne sang manok nga karga sang mga barko nga gikan sa Luzon kag nagadungka sa Bacolod.
Ginklaro sini nga ini nga tikang ang bilang pagsiguro lamang nga indi makasulod ang H5N1 virus sa Bacolod kag Negros Occidental.
Kahapon sang hapon, nakabaton si Dr. Dela Torre sang mensahe gikan kay DA-NIR Director Joyce Wendam kag nagapaalinton nga may gin-deploy na nga quarantine personnel gikan sa Bureau of Animal Industry (BAI) sa Bredco Port kag duha man sa talatapan sang DA-NIR.
Magluwas sini, magalibot man ang city veterinarian, upod sa City Health Office, sa mga manokan sa Bacolod agud sikyaron kun luwas ang mga ini sa bird flu.
Apang ginpabutyag ni Dr. Dela Torre nga pipila na lamang ang poultry farms sa Bacolod bangud kalabanan sa mga ini ang yara sa mga kabanwahanan.
Samtang, gina-monitor sang Committee on Market and Slaughterhouse ang pag-ihaw sang manok sa ciudad sang Bacolod agud masiguro nga luwas ini nga konsumuhon sa tunga sang bird flu outbreak sa Luzon.
Suno kay Executive Assistant Ernie Pineda, ila gina-monitor ang proseso antes kag pagkatapos ihawon ang manok agud mapiho nga luwas ini nga kaunon sang mga konsumidor.
Ginpabutyag man ni Pineda nga dapat mabalik na sa slaughterhouse sang ciudad ang pag-ihaw sang manok, kaangay sang pag-ihaw sang iban nga sapat, agud mangin mas mahapos ang pag-monitor kag pag-regulate sang mga karne nga ginabaligya sa merkado.
Nahibaluan nga sa Agusto 22, may patigayunon nga public hearing tuhoy sa pagbukas sang chicken line ukon ang ilihawan sang manok sa salughterhouse.
Samtang, ginpahayag ni Executive Assistant Pineda nga ang bird flu oubreak sa Pampanga ang wala pa nakaapekto sa baligyaanay sang manok sa mga merkado sang Bacolod kun sa diin wala man sang paghulag sa presyo.
