Liwat nga ginduso ni Senate Minority Leader Vicente “Tito” Sotto III ang pagpatigayon sang random drug testing sa sulod sang Senado agud masiguro nga nagapabilin nga drug free ang ila area of jurisdiction.
Suno kay Sotto, ginpatuman sini ang nasambit nga programa sang siya ang Senate President sa 18th Congress kun sa diin ginpaidalum sang surprise drug test ang 300 ka mga empleyado sang Senado kag lunsay nagnegatibo ang tanan.
Mangin ang mga Senador nga boluntaryo nga nagpaidalum sa testing ang nagnegatibo man.
Apang nauntat ang programa matapos ang iya termino bilang pinuno sang Senado.
Ang ini nga hagna ang ginduso sa tunga sang imbestigasyon sa karun sa isa ka staff ni Senator Robin Padilla nga ginapatihan nagagamit sang illegal nga druga sa sulod sang Senate building.
