BACOLOD CITY — Nakahanda si Fire Senior Supt. Fred Trajeras pananglitan kinahanglan ini magbiya bilang acting regional director sang BFP Negros Island Region subong nga bag-o ang pinuno sang amo nga ahensya.
Nahibaluan nga basta bag-o ang chief, ginalauman na ang revamp ukon reshuffling sang mga regional directors.
Apang kadungan sang pagpungko ni Fire Chief Superintendent Leonardo Bañago bilang acting chief sang BFP suno kay Trajeras, magapabilin pa ini sa karun nga director sang NIR kag wala pa sang notice sa reshuffling.
Suno diri, madamo pa sang mga programa kag proyekto nga indi mabayaan sa NIR kag ginpasalig man ni Bañago nga suportahan sini ang acting regional director nga matapos ang dapat nga ubrahon sa bag-o lamang nabun-ag nga rehiyon.
Aminado si Trajeras nga may maayo sila nga relasyon ni Bañago antes ginbutang bilang acting Fire Chief kun sa diin nakita sini ang maayo niya nga performance sa NIR.
Nagalaom naman si Trajeras nga mahatagan ang NIR sang dugang nga numero sang mga personnel sa masunod nga hiring ilabi na nga may mga fire stations nga dapat i-activate kag nagakinahanglan sang mga bombero.
Subong nga adlaw, magaabot sa Bacolod ang bag-o lang nagpungko nga acting chief sang Bureau of Fire Protection nga si Fire Chief Superintendent Leonardo Bañago bisan sang Lunes lamang ini nag-assume sa iya nga posisyon.
Mismo si Trajeras ang nagkumpirmar sini sa interview sang Bombo Radyo Bacolod.
Suno kay Trajeras, si Bañago ang mangin guest speaker sa recognition ceremony sang nagasabak sa karun sa Fire Basic Recruit Course sa Panaad Park and Stadium sa Lunes sang aga.
Las 5:30 sang aga, magaabot sa Bacolod Silay Airport si Bañago sa diin pagahatagan ini sang side honors.
Siya ang magadiretso sa Panaad Park and Stadium kun sa diin ini ang hatagan sang arrival honors las 6:00 sa aga kag magasugod ang program proper las 7:00 sa aga.
Suno kay Trajeras, maswerte ang Negros Island Region bangud sa baylo nga magtambong sa flag raising ceremony sa national headquarters ang acting chief, mas ginpili sini ang pagbisita sa rehiyon.
