Ginpahayag sang mga llamador sa probinsya sang Negros Occidental nga ipadangat nila sa national agencies ang ila nga reklamo kun indi pa masolusyunan.
Ini ang may kaangtanan sa machine-based betting kag online e-sabong bangud ini ang kabangdanan nga nagakadulaan sila sang palangabuhian bangud wala na sang llamador sa sulod sang bulangan kag sa machine nalang nagataya ang mga nagapusta.
Nahibaluan nga ang probinsya ang may yara sang Provincial Ordinance 011, Series of 2025 nga hugot nga nagadumili sa e-sabong ukon machine-based betting sa sulod sang mga bulangan.
Suno kay Joel Magalona, isa sa mga llamador ang Kalibo kag Iloilo ang wala sang machine-based betting kag puro llamador ang yara sa bulangan apang sa Negros Occidental nga number 1 sa mga cockfighting ang wala na sang llamador bangud sa machine betting.
Suno kay Magalona, nalipay na sila sadto bangud gindula na ini bangud sa ordinansa nga gindihon sang probinsya.
Nadulaan naman sila sang pagsalig kay Board Member Andrew Montelibano bangud siya ang nagpauntat sang machine betting apang sa karun ginpabalik man ini.
Suno diri kun sin-o ang nagpauntat siya man ang nagpabalik.
Ginrefer man niya ini sa Negros Occidental Police Provincial Office agud nga mapatuman ang ordinansa batok sa machine betting apang ginsabat lamang ini nga nagahulat lamang ang mga kapulisan sang order sang probinsya.
Suno diri kun indi ini mahimuan sang tikang ipalab-ot nila ini kay Senator Raffy Tulfo kag sa Games and Amusement Board.
