Gin-athag sang pinuno sang interagency task force sang Bacolod City nga fake news ang report nga lifted na ang liquor ban sa ciudad.
Sa interview sang Bombo Radyo kay Vice Mayor El Cid Familiaran, ginpahayag sini nga may mga proposals nagikan sa business sector tuhoy sa liquor ban nga ila ginadiskusyunan apang wala pa nakapagwa sang executive order si Mayor Evelio “Bing” Leonardia, gani nagapabilin nga alas 12:00 sang udto tubtob alas 6:00 sang gab-i lang sarang makabakal sang makahulubog nga ilimnon kag indi pwede makainom sa pampubliko nga lugar.
Suno kay Familiaran, dapat maghalong ang mga nagapagwa sang ini nga detalye bangud wala sila sang otoridad gani mas maayo nga hipuson nalang anay ang ila mga baba bangud wala pa nakapagwa sang EO ang alkalde kag basi magpinagusto naang mga tawo.
Suno sa iya, indi lang kuntani pagpangunahan ang alkalde kag hulaton kun ano man ang iya nag desisyon.
Samtang, iverify pa sang ciudad suno kay Familiaran kun lehitimo ang video kun sa diin makit-an nga nagaparty ang mga tawo sa Stone Hills Hotel kag wala nagaobserbar sang minimum health protocols.
Suno sa bise-alkalde, kun maglab-ot sa ila ang reklamo, ila ini ipatsekyar kag kun mapamatud-an nga matuod-tuod ang video kag wala sila nagasunod sa protocols, responsible kag accountable ang tag-iya sang establishmento.
