Ginaduso ni Negros Occidental 3rd District Board Member Andrew Montelibano nga mapunggan ang mga dalagko nga commercial fishing vessels nga makapanguha sang isda sa mga Municipal kag City Waters.
Sa interview sang Bombo Radyo Bacolod kay Montelibano, may daan na nga ordinansa ang probinsya angot diri, gani luyag na lamang niya nga mapabaskog kag estrikto nga mapatuman.
Suno diri, ang tikang ang indi lamang para maprotektahan ang fishing grounds, subong man ang mga lokal nga mangingisda.
Ini bangod indi luyag ni Montelibano nga ang mga isda nga makuha pa kuntani sang mga magagmay nga mangingisda kag mabaligya sa lokal nga merkado ang maubos na sang dalagko nga mga fishing vessels.
Apang antes makahimo sang proposal, siya ang nagrequest sa mga local government units (LGUs) kag Fisherfolks Association nga maghuman sang ila nga proposal.
Suno kay Montelibano, mas maayo nga mahugpong na lamang sa isa ka resolusyon kun sa diin nakonsiderar na ang bahin sang mga fisherfolks kag LGUs antes ipasaka sa Sangguniang Bayan, agud wala na sang basulay kag reklamo sa ulihi.
