BACOLOD CITY – Wala sa gihapon makaguwa ang resulta sang laboratory examination sa water sample nga ginkuha sa Marayo River sa banwa sang Pontevedra sa diin may nagluntad nga fishkill sang tinalikdan nga semana.
Ini ang ginpahayag ni Mayor Jose Benito Alonzo sa interview sang Bombo Radyo.
Suno sa alkalde, nagkuha sila sang water sample upod sa mga tiglawas sang Roxol Bioenergy Corporation, Central Azucarera de La Carlota, Incorporated (CACI), Environmental Management Bureau (EMB) kag Department of Environment and Natural Resources (DENR) sadtong Byernes, Pebrero 24 kag ginalauman nga sa Sabado, Marso 4, pa magaguwa ang resulta.
Suno kay Mayor Alonzo, mahibaluan sa resulta kun ano ang gintunaan sang paglubog sang tubig kag pagkalamatay sang mga isda sa Suba sang Marayo.
Nahibaluan nga duha ka bulan na ang nakaligad, gintinguhaan man sang local government sang banwa sang Pontevedra kag ciudad sang La Carlota nga ipasira ang sentral kag planta apang hinali may naguba nga makina rason nga boluntaryo man ini nagpanira.
