Nakapyansa na si retired Air Force major general kag United People’s Initiative (UPI) convenor Romeo Poquiz matapos gin-aresto sa Ninoy Aquino International Airport (NAIA) sa Pasay City may kaangtanan sa kaso nga inciting to sedition.
Base sa arrest warrant nga ginpakita sang iya legal counsel nga si Atty. Ferdinand Topacio, gintalana sa P48,000 ang pyansa para sa amo nga kaso.
Una nga gindala si Poquiz sa Camp Crame para sa pagproseso antes ginsaylo sa Quezon City Regional Trial Court Branch 77 kun sa diin ini ang nagpyansa.
Ginserbe sa iya ang arrest warrant sang pag-abot sini sa NAIA sang Lunes sang aga nagikan sa pagbakasyon sa Bangkok, Thailand, suno sa Criminal Investigation and Detection Group-National Capital Region (CIDG-NCR).
Sa isa ka interview kay Poquiz, gintawag niya nga harassment kag pagpamahog ang pag-aresto sa iya.
Suno pa diri ang nga katuyuan nga gindakop ini agud nga mapahipos ang mga kritiko sang gobyerno.
Ang kaso ang na-angot sa gina-alegar statement ni Poquiz sa protest actions nga ginpatigayon sa People Power Monument sa Quezon City sang November 16 kag 17.
Apang ginpanginwala niya nga naghimo ini sang seditious statements kag ginpanindugan nga pagpabutyag lamang niya ini sang iya kaakig sa gina-alegar kurapsiyon.
Sa isa ka statement, ginpahayag sang Armed Forces of the Philippines (AFP) nga samtang protektado sa idalom sang Constitution ang freedom of expression, dapat nga i-exercise ini nga nakasandig sa layi.
