Nangin kalmado na ang sitwasyon sa United Kingdom kasunod sang ginpatigayon nga mga anti-racist counter-protest, apang padayun gihapon nga ginapa-alerto ang mga Pilipino.
Sa interview sang Bombo Radyo Bacolod kay Ramil Isogon, Bombo International News Correspondent derekta sa United Kingdom, nangin malinong ang peaceful rally kag naghagan-hagan naman ang bayolente nga anti-immigrant riots.
Paathag sini nga nag-umpisa ang kinagamo sang Hulyo 29, kun sa diin napatay ang tatlo ka babayi nga yara sa anom tubtob siyam ka tuig, samtang walo naman ka kabataan kag duha ka adult ang nasamaran matapos nga nagpang-atake sang kutsilyo ang 17 anyos.
Apang bangod sa gina-alegar sala nga impormasyon sa social media nga nagapahayag nga Islamist migrant ang suspect, nag-ibwal ang far right organization nga nagapamatok sa mga immigrants.
Gin-atake sang mga ini ang mga mosque, kag mga establishimento kag salakyan nga ginapanag-iyahan sang mga asians kag iban nga nationalities kun sa diin duha ka mga Filipino nurses ang nasamaran matapos gin-atake apisar nga magacater lamang kuntani sa mga nasamaran sa riots.
Sa nauna nga mga riots, madamo man sang mga kapulisan nga nasamaran kag mga police cars nga ginpangsunog.
Apang sa pagpatigayon sang malinong nga anti-racist counter-protest, naghagan-hagan man ang pihak nga grupo.
Sa pihak sini, padayun ang mga ini nga nagakahangawa ilabi na nga yara gihapon ang posibilidad sang pagbalik sang riots.
Ginpanawagan naman sang Philippine Embassy nga likawan anay sang mga Pilipino nga magtipon-tipon, indi maggwa kun indi kinahanglan kag masami nga magbantay sa mga balita.
Nagdeploy naman sang mga kapulisan sa nanarisari nga bahin sang United Kingdom agud malikawan ang liwat nga pagluntad sang mga riots.
