Ginbasura sang Sangguniang Panlungsod sang Silay City ang request nga resolution of no objection (RONO) para sa Negros Occidental Bulk Water Supply Project nga magakuha kuntani sang tubig sa Hinalinan River/Imbang River sa Barangay Guimbala-on, Silay City.
Ang amo nga project ang ginpangunahan ni Negros Occidental Governor Eugenio Jose “Bong” Lacson nga may P1.1 million budget.
Nahibaluan nga nagpatigayon sang public hearing sa pagpanguna sang Committee on Environment, sang Disyembre 3, Enero 17 ka Enero 20, 2026 agud usisaon kun may ara sang nakaigo nga basihan sa pag-isyu sang RONO.
Sa interview sang Bombo Radyo Bacolod kay Silay City Vice Mayor Tom Ledesma, nagpatigayon sang konsultasyon ang duha ka barangay nga apektado sang proyekto.
Sa resulta sini, pareho nga nagdesisyon ang duha ka barangay sa pagdis-aprubar sang RONO nga amo ang nangin una nga basehan sang council sa pagbasura sang request.
Dugang pa sini nga ginpahayag man ni Silay City Mayor Joedith Gallego nga may iban nga ginalantaw alternatibo nga mahimo kuhaan sang tubig kaangay sang Malogo River.
Suno diri, nakita sang lokal nga gobyerno nga indi makasarang ang kapasidad sang Hinalinan/Imbang River para sa malapad nga supply, gani ginakonsiderar ang iban nga option.
Dugang pa sini, nga ginalantaw man ang posible nga environmental effect sang proyekto, nga isa sa rason sa pagbasura sang RONO.
